Naglakad kami pauwi sa bahay, tutal malapit naman ang bahay at sanay sa lakaran tong si Mariel ewan ko lang kay Neneng kung kaya nya pa maglakad o magpapakarga na sa akin. Pero sa tingin ko enjoy naman tong bata at nakangiti ba habang napapapikit dahil tumitingala sya at nasisinagan ang mata nya. Pinagsabihan kong wag syang tumingin sa araw at mabubulag sya. Si Mariel naman tinitignan din si Mariel pero halatang wala syang interes sa mga oras na yon, dahil nakatuon ang atensyon nya kay Neneng. Mahilig sa bata si Mariel lalo na kapag daw bibo, minsan nga yung batang pulubi dun sa tapat ng school ay nanlilimos sa kanya, pero inutusan ko yung bata na kumanta. Una nagalit sa akin si Mariel pero nang kumanta na ang bata ay biglang napangiti sya at hindi mapigil ang tuwa, hinatak nya ang bata sa pinaka malapit na bakeshop at binilan nya ng tinapay at inuman, at binigyan nya pa ng limang daang piso.
Kung kasing buti ni Mariel lahat ng tao sa mga pulubi, tiyak walang pulubing naka yapak lahat naka Havaianas tapos naka tshirt ng Artwork at naka pabango ng Penshoppe. Talagang maawain si Mariel sa mahihirap, kahit mayaman kasi sya hindi sya nandidiring humawak sa mga batang yagit, hindi katulad ko na mahirap din eh mas maarte pa ako sa ipis. Kung sino pa ang tulad kong dukha yun pa ang maarte. Lagi nga akong may dalang hand sanitizer eh. Pero walang powder para sa mukha, walang salamin, na katulad ng ibang lalake na malandi pa sa kambing kung mag-ayos ng sarili. Tanging pinang didipensa lang nila ay kailangan daw mukha kang malinis at presintable. Eh paano ka magiging mukhang presintable at malinis kung maya maya kang nag lalagay ng pulbos sa mukha mo, baka akalain na aattend ka sa isang Halloween Party.
Malapit na sa bahay na kulay pink ang bakod na mukhang dinekwat namin sa MMDA pink fences, pero sabi ko nga chicken wire yan na pininturahan ni Nanay ng pink. Kaya kung lalabas kami ni Tatay ay nahihiya kami sa bakod namin, mukha tuloy kaming magnanakaw ng pink fences. Halos alas dos na ng hapon pumasok na kami sa loob ng bahay, si Neneng diretso sa kwarto nila Nanay at Tatay. Tinawag nya siguro si Mariel naman pinaupo ko lang muna at magpahinga sya sandali dahil mainit at naglakad kami baka napagod sya, ako naman kumuha ng electric fan at itinutok sa kanya. Nililipad ang buhok nyang akala mo'y pinaliguan sa pinaka mahal na shampoo, ang nipis ng hibla ng buhok nya, pero maganda ang bagsak. Ano ba tong pinagsasabi ko, mukha tuloy akong hair expert, hindi ako si Ricky Reyes ah. Nilabas ko sa pridyider ang 1.5 litro na Pepsi, kahapon ko pa to binili buti na lang hindi ko ininom kahapon, dahil nagkape na lang ako.
Lumabas na si Nanay at si Tatay, nag mano ako sabay sabing:
"Nay, Tay sya si Mariel yung kasamahan ko sa trabaho at kaklase ko din at kaibigan ko sya nung elementary. Buti nga nakita ko sya ulit, hehehe."
Si Tatay naman may pasimpleng tirada:
"Oh hija, masaya ba at masarap ba maging boyfriend tong anak ko? Alam mo bang ikaw pa lang ang dinala nyang babae dito, sabi ko noon wag muna syang makikipag relasyon, pero sa tulad mong maganda at alam kong mabait ka sa itsura palang, payag na ako."
Sumagot ako ng may halong inis:
"Tay kaibigan ko lang sya...Basta po."
Si Nanay naman kinamusta lang si Mariel at nag iwan ng onteng salita ewan ko kung bakit:
"Hija, kumusta? Matino ba to sa school at sa trabaho? Kung hindi sabihin mo sa akin at pipingutin ko yan."
Tumawa si Mariel at sumagot:
"Mabait po sya sa school at trabaho, kaso palaging late hahaha. Hindi ko po sya nobyo magkaibigan lang po talaga kami, as in close friend ko po sya, pwede na ding best friend."
Natigil ang usapan, binuksan ni Nanay ang tv, si Tatay nagluto na ng pagkain, kahit alam na nilang kumain kami, gusto padin nila pakain si Mariel, magaling magluto ang Tatay ko, bukod sa magaling sa pagaayos ng kuryente master chef ng bahay yan, talo pa nga nya si Nanay sa pag gayat ng mga gulay.
Walang komento:
Mag-post ng isang Komento