Tinimplahan ko ng gatas tong pamangkin ko, hindi ko lang alam kung sa baso na sya umiinom. Eh para maiba nilagyan ko ng straw ang gatas nyang nasa baso, pagkabigay ko sakanya sabi ay parang Jollibee daw. Para naman matuwa talaga sya nagsuot na lang ako ng uniporme ko, tapos nagluto ako ng sinangag at nilagay ko sa tray, kunwari nag order sya ng pagkain, at ako ang food server. Naka ngiti sya sa akin, nilapitan nya ako at niyakap sabay bulong sa akin ng “I lab yu kuya.” Ako naman napangiti na lang dahil ang sarap ng pakiramdam na meron kang kapatid na bata, kahit makulit eh kapag pinatawa mo talagang tatawa.
Napag aralan ko sa psychology nung first year college ako, pero nakalimutan ko na yung tawag, yung bata daw alukin mo ng bente pesos at tatlong piso, pipiliin daw nung bata yung tatlong piso. Eh para mapantunayan ko sinubukan ko sa pamangkin ko, pinakita ko yung bente pesos, at tatlong piso. Sabi ko kumuha sya, aba sinagot ba naman ako na “Bakit kuya meron kang bente tres pesos? Sayo yan eh, ayaw ko kumuha.” Ang inaasahan kong pagkuha nya sa tres ay hindi nangyari, nagulat ako marunong na syang magbilang sa bata nyang edad, ako ata naka ilang palo pa si Nanay sa akin, sumbong ako ng sumbong kay Tatay na pinalo ako ni Nanay dahil hindi ako nagbibilang, pipingunitin naman ako ni Tatay at dadalin ako kay Nanay.
Eh dahil naman bibo tong pamangkin ko tinanong ko kung nasaan si Tatay at Nanay, sumagot sya agad, nagpunta daw ng palengke nagtinda daw, uuwi daw ng alas dose ng tanghali. Nako tong bata na to, madaldal madaming alam agad bata pa lang. Medyo tinatamad na ako dito sa bahay, eh bagong ligo naman ako punta na lang kaming Mcdo. Iwanan ko na lang sila ng sulat na dinala ko itong bata. Text ko na din tong si Mariel.
“Mariel, hehe, pwd 12 n lng tau mgkita sa mcd0?? My ksma ak0ng girl.. hehe, pnta k n dali..”
“Gago ka Lando, :( sino yang kasama mo?”
“Bsta pnta k na lng hehe..”
Hehehe halatang selos agad tong si Mariel sa sinabi ko. Pero hindi padin ako ready na sabihin na mahal ko sya, i eenjoy ko na lang kung anong meron na namamagitan sa aming dalawa. Masaya naman kami eh, kahit hindi kami. Okay na din. Kahit walang lambingan. Okay na din. Pero parang kinukundisyon ko lang ang isip ko na okay lang, hindi naman ako tanga, mas gusto kong maging kami na lang at hindi ko sya papakawalan. Pero baka naman pag sinabi kong MAHAL KITA MARIEL AT HINDI KITA PAPAKAWALAN, baka pumasok sa isip nya na ilalagay ko sya sa isang kural, para makatakas sya sisipain nya yung kural at ako naman ang sisipain nya. Lagi ko nalang naiisip na sisipain nya ako, paano ba naman kasi, kapag naglalakad kami yan palagi ang kinukwento nya ang mga bagay tungkol sa mundo ng martial arts, eh hindi ko tipo yung manakit, mas gusto ko pang manuod ng home shopping network na nagbebenta ng pampalaki ng boobs, kaysa manood ng boxing o ufc.
Naka dating na din sa mcdo, sabi ni Mariel wait lang daw ng 5 minutes at malapit na sya. biglang may nagtext.
“Sino ba kasi yang kasama mo? Naiinis na ako.”
“Bsta, wg k mainis..”
Isang malakas na tawa ang narinig ko, sya na pala yon. Natawa ata sya dahil kala nya babaeng dalaga na ang kasama ko, yung pamangkin ko lang ang kasama ko. Lumapit sya at kinausap ang pamangkin ko, tinanong ni Mariel kung ano ang pangalan ng pamangkin ko bibong bibo sumagot with matching ngiti“Ako si Neneng, ikaw ano pangalan mo?” tuwang tuwa si Mariel at sinabi nya ang pangalan nya ako naman biglan sumabat “Tagal tagal ko ng tinatanong anong pangalan mo hindi ka sumasagot! Hahaha”Tawanan lang kami, nag order na ako ng float yun muna. Tapos burger at isang kiddie meal para kay Neneng. Tuwang tuwa ang bata, dahil sa probinsya puro kalabaw ang kalaro nya, ngayon laruan na talaga ang nilalaro nya.
Walang komento:
Mag-post ng isang Komento